ភ្នំពេញ: នៅយប់ថ្ងៃទី០៣ ខែសីហា ឆ្នាំ២០២១ លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការរាជធានីភ្នំពេញ បានដាក់បទបញ្ជាទៅគណៈបញ្ជាការឯកភាពខណ្ឌទាំ១៤ ឱ្យសង្កាត់ទាំង១០៥ ជាពិសេសចៅសង្កាត់​​តែម្តង ត្រូវចុះផ្ទាល់ដល់មូលដ្ឋានរបស់ខ្លួន ដើម្បីធ្វើការណែនាំឱ្យប្រជាពលរដ្ឋ កុំដើរហើរ​ល្មើសនិងបម្រាម​គោចរ ហើយណែនាំឱ្យប្រជាពលរដ្ឋត្រូវនាំកូនចៅដែលជាកុមារ​​និងយុវវ័យអាយុ​​១២ ទៅក្រោម១៨ឆ្នាំ ទៅចាក់វ៉ាក់សាំងឱ្យបានគ្រប់ៗគ្នា។

លោក ឃួង ស្រេង បានបន្តថា សង្កាត់មួយចំនួនបានអនុវត្តការងារនេះយ៉ាងម៉ឺងម៉ាត់ផងដែរ ខណៈលោកបានដឹកនាំក្រុមការងារចុះពិនិត្យជាក់ស្តែង គឺឃើញសង្កាត់ទឹកល្អក់ទី១ ខណ្ឌទួលគោក សង្កាត់បឹងត្របែក ខណ្ឌចំកាមន សង្កាត់កាកាបទី១ ខណ្ឌពោធិសែនជ័យ សង្កាត់ច្បារអំពៅទី២ ខណ្ឌច្បារអំពៅ និងសង្កាត់មួយចំនួនទៀតក៏បានចុះធ្វើការងារផ្សព្វផ្សាយ ដើម្បីរួមគ្នាឈានទៅផ្តាច់ប្ញសគល់ជំងឺកូវី-១៩ ជាពិសេសវីរុសបំប្លែងថ្មីដែលតា (DELTA) បានយ៉ាងល្អ។

គួរបញ្ជាក់ថា អ្នកល្មើសនឹងបម្រាមនេះនឹងត្រូវផាកពិន័យយ៉ាងធ្ងន់ធ្ងរបំផុត ដោយសម្រាប់ម៉ូតូ១គ្រឿងត្រូវផាកពិន័យចំនួន២០ម៉ឺនរៀល ចំណែកឯរថយន្តត្រូវផាកពិន័យចំនួន ១លានរៀល ហើយបើធ្ងន់ធ្ងរនឹងមានទោសទណ្ឌ ថែមទៀតផង៕

^{ប្រភព៖ AKP}